ASIG merr pjesë në workshop-in e organizuar për Kadastrën Kombëtare të Burimeve Ujore në Shqipëri
Agjencia e Menaxhimit të Burimeve Ujore AMBU organizoi më 15 Nëntor 2019 në ambientet e Grand Hotel, Tiranë, workshop-in në kuadër të projektit “Për krijimin e platformës institucionale dhe rregullatore për qeverisjen dhe funksionimin e Kadastrës Kombëtare të Burimeve Ujore në Shqipëri” ku morën pjesë edhe përfaqësues të Autoritetit Shtetëror për Informacionin Gjeohapësinor nga sektori i Standardeve për Gjeoinformacionin dhe sektori i GIS-it Kombëtar.
Ky workshop u fokusua kryesisht në paraqitjen e një përmbledhjeje të projektit të implementimit të Kadastrës Kombëtare të Burimeve Ujore në Shqipëri si dhe në prezantimin e punës së deritanishme dhe hapat e mëtejshëm duke evidentuar mangësitë dhe gjendjen aktuale të infrastrukturës matëse për burimet ujore në Republikën e Shqipërisë.
![](https://asig.gov.al/wp-content/uploads/2023/10/worshop2-1024x766.jpg)
ASIG merr pjesë në konferencën e përfundimit të programit IPA DRAM
Konsorciumi i programit IPA DRAM, “Vlerësimi i Riskut nga fatkeqësitë dhe hartat”, organizoi konferencën finale më datë 19 nëntor 2019, si dhe takimin e Komitetit Drejtues të IPA DRAM në datë 20 nëntor 2019, në Bruksel, Belgjikë. Ky program synon mbështetjen në fushën e menaxhimit të riskut nga fatkeqësitë, për të siguruar menaxhimin e duhur të tij në nivel kombëtar, për vendet e Evropës Juglindore si Shqipëria, Bosnje dhe Hercegovina, Maqedonia e Veriut, Kosova, Mali i Zi, Serbia dhe Turqia.
Autoriteti Shtetëror për Informacionin Gjeohapësinor (ASIG) u përfaqësua në këtë event si institucion qendror i përfshirë në këtë program, me z. Dritan Prifti, përgjegjës i sektorit “Remote sensing” i cili mori pjesë në panelin e Atlasit Elektronik Rajonal të Riskut (ERRA) ku paraqiti kontributin e Shqipërisë si një praktikë e mirë e përfshirjes së Infrastrukturës së të Dhënave Gjeohapësinore Kombëtare në mbështetjen e aktiviteteve për mbrojtjen civile, si dhe sinergjitë midis projekteve rajonale, të IPA DRAM dhe projektit IMPULS.
Qëllimi kryesor i konferencës ishte të prezantojë arritjet dhe rezultatet e partnerëve të programit IPA DRAM, të shkëmbejë eksperiencat e krijuara dhe të diskutojë se si mund të të përdoren rezultatet e programit.
![](https://asig.gov.al/wp-content/uploads/2023/10/rsz_ipadram2.jpg)
![](https://asig.gov.al/wp-content/uploads/2023/10/rsz_ipadram3.jpg)
Workshop mbi ndarjen e të dhënave dhe shërbimeve gjeohapësinore
Autoriteti Shtetëror për Informacionin Gjeohapësinor (ASIG), në bashkëpunim me projektin IMPULS, organizoi në datë, 20.11.2019, në ambientet e Hotel Tirana Internacional workshop-in me temë: “Ndarja e të dhënave dhe shërbimeve gjeohapësinore” Në këtë workshop morën pjesë përfaqësues të autoriteteve publike përgjegjëse, për temat e nenit 11, të ligjit nr 72/2012, “Për organizimin dhe funksionimin e Infrastrukturës Kombëtare të Informacionit Gjeohapësinor në Republikën e Shqipërisë” si dhe eksperti i autoritetit suedez të hartografisë “Lantmateriet”, Z.Gunnar Lysell, përfaqësuesi i projektit IMPULS. Ekspertetët e ASIG në këtë workshop prezantuan;
• Aktet nënligjore të miratuara për rregullat uniforme të infrastrukturës së informacionit gjeohapësinor dhe shkëmbimin e të dhënave dhe shërbimeve gjeohapësinore mes autoriteteve publike.
• Projekti i GIS-i Kombëtar dhe hapat e ndërmarra nga ASIG për realizimin e këtij projekti .
• Shkëmbimi i të dhënave dhe shërbimeve gjeohapësinore nëpërmjet Gjeoportalit Kombëtar dhe demonstrim praktik të këtij shkëmbimi.
Eksperti suedez prezantoi në këtë workshop modele mbi licensimin dhe të drejtën e autorit për të dhënat gjeohapësinore, tarifimin e tyre dhe eksperiencën suedeze në shkëmbimin e informacionit gjeohapësinor.
Pjesëmarrësit nga autoritetet publike vlerësuan arritjet e ASIG në krijimin e infrastrukturës kombëtare të informacionit gjeohapësinor dhe asistencën e ofruar prej tij për autoritetet publike.
![](https://asig.gov.al/wp-content/uploads/2023/10/rsz_1workshop3.jpg)
![](https://asig.gov.al/wp-content/uploads/2023/10/rsz_workshop1.jpg)
ASIG merr pjesë në eventin e mbylljes së projektit IMPULS
Përfaqësues të Autoritetit Shtetëror për Informacionin Gjeohapësinor (ASIG), të kryesuar nga Drejtori i Përgjithshëm z. Lorenc Çala, morën pjesë në eventin e mbylljes së projektit IMPULS, i cili u mbajt më datë 13 Nëntor 2019, në Banja Luka të Bosnje-Hercegovinës.
Qëllimi kryesor i kësaj konference ishte prezantimi i arritjeve dhe rezultateve kryesore të projektit IMPULS nga koordinatorët dhe drejtuesit rajonalë, të institucioneve përgjegjëse për hartografinë dhe kadastrën nga shtetet e Ballkanit Perëndimor, respektivisht nga Kosova, Shqipëria, Maqedonisë së Veriut, Mali i Zi, Bosnje-Hercegovina, Serbia, Sllovenia dhe Kroacia.
Objektivat kryesore të projektit ishin:
· Implementimi i Direktivës INSPIRE në rajonin e Ballkanit Perëndimor duke i ndihmuar vendet përftuese të plotësojnë kërkesat e BE- së në fushën e gjeoinformacionit si dhe për të kontribuar në zhvillimin ekonomik, transparencën dhe luftën kundër korrupsionit.
· Kontributi i sektorit të gjeoinformacionit nëpërmjet ndërveprimit të të dhënave dhe shërbimeve, në zhvillimin e E-Qeverisjes së shteteve pjesëmarrëse në nivel qendror dhe vendor.
![](https://asig.gov.al/wp-content/uploads/2023/10/rsz_impuls1.jpg)
ASIG merr pjesë në Konferencën XII Rajonale për Kadastrën dhe Infrastrukturën e Informacionit Gjeohapësinor
Përfaqësues të Autoritetit Shtetëror për Informacionin Gjeohapësinor (ASIG), të kryesuar nga Drejtori i Përgjithshëm z. Lorenc Çala, morën pjesë në Konferencën e 12-të Rajonale për Kadastrën dhe Infrastrukturën e Informacionit Gjeohapësinor në Ballkanin Perëndimor e cila u mbajt më 5 dhe 6 shtator 2019, në Neum të Bosnje-Hercegovinës.
Qëllimi kryesor i kësaj konference ishte nënshkrimi i marrëveshjes së bashkëpunimit dhe mirëkuptimit midis institucioneve përgjegjëse për hartografinë dhe kadastrën nga shtetet e Ballkanit Perëndimor, respektivisht nga Kosova, Shqipëria, Republika e Maqedonisë së Veriut, Mali i Zi, Bosnie-Hercegovina, Serbia, Sllovenia dhe Kroacia.
Kjo marrëveshje synon ngritjen e shkallës së bashkëpunimit mes institucioneve respektive në fushat e interesit të përbashkët, duke përfshirë avancimin e bashkëpunimit në kadastër, gjeodezi dhe hartografi, në zhvillimin dhe ndërveprueshmërinë e sistemeve GNSS, në zhvillimin e rrjeteve gravimetrike dhe trigonometrike, në harmonizimin dhe hapjen e të dhënave gjeohapësinore konform politikave dhe direktivave të BE-së.
Kjo marrëveshje pati mbështetje edhe nga autoritetet në fushën e hartografisë dhe kadastrës të Suedisë, Norvegjisë, Holandës, si dhe organizatat ndërkombëtare, Banka Botërore dhe JICA, të cilat ishin njëkohësisht edhe promotorë të arritjes së kësaj marrëveshjeje.
![](https://asig.gov.al/wp-content/uploads/2023/10/konferencaXII_opt.jpg)
![](https://asig.gov.al/wp-content/uploads/2023/10/konferencaXII2_opt.jpg)
Workshop mbi “BESTSDI Albania”
Autoriteti Shtetëror për Informacionin Gjeohapësinor (ASIG), në bashkëpunim me Fakultetin e Inxhinierisë së Ndërtimit (FIN), organizoi në datë 03.07.2019, në ambientet e ASIG , salla “Evropa”, workshop-in me temë “BESTSDI Albania”. Në këtë workshop morën pjesë drejtues të ASIG si dhe studentë e pedagogë të Departamentit të Gjeodezisë në Fakultetin e Inxhinierisë së Ndërtimit (FIN).
Qëllimi i këtij workshop-i ishte të evidentonte hapat e hedhura për ndërtimin e Infrastrukturës Kombëtare të Informacionit Gjeohapësinor (NSDI) në Republikën e Shqipërisë, në kuadër të implementimit të direktivës INSPIRE, si dhe përdorimin e të dhënave dhe shërbimeve gjeohapësinore nga profesionistët e fushës dhe studentët e gjeodezisë.
Drejtori i Përgjithshëm I ASIG, z. Lorenc Çala, në prezantimin e tij bëri një ekspoze të hapave dhe arritjeve të ASIG në krijimin e NSDI-së bazuar në rregullat dhe standardet e direktivës INSPIRE dhe nevojën për një zhvillim të mëtejshëm të fushës së gjeoinformacionit bazuar në nevojat e përdoruesve. Për të bërë të mundur ndjekjen e zhvillimeve teknologjike u theksua nevoja e përshtatjes së kurikulave të studimit, për fushën e gjeoinformacionit.
Drejtues të ASIG prezantuan temat kryesore në SDI-së, Gjeoportalin Kombëtar dhe ofrimin e shërbimeve të tij në përputhje me standardet e INSPIRE, modelimi i të dhënave sipas standardeve të miratuara dhe harmonizimi i të dhënave ekzistuese si dhe bashkëpunimi me projektet e financuara nga donatorët e huaj, veçanërisht roli dhe ndihmesa e projektit IMPULS në ndërtimin e Infrastrukturës Kombëtare të Informacionit Gjeohapësinor në Shqipëri.
![](https://asig.gov.al/wp-content/uploads/2023/10/bestsdi02.jpg)
![](https://asig.gov.al/wp-content/uploads/2023/10/bestsdi03.jpg)
Vizitë e studentëve të fakultetit të Historisë dhe Filologjisë në ambientet e ASIG
Profesorë dhe studentë të Universitetit të Tiranës, të fakultetit të Historisë dhe Filologjisë, Departamenti i Gjeografisë,
në programin e studimit Master Profesional (GIS i aplikuar), bënë një vizitë në ambientet e Autoritetit Shtetëror për Informacion Gjeohapësinor (ASIG).
Drejtori i përgjithshëm i ASIG z. Lorenc Çala, pasi i falënderoi për vizitën, i njohu ata me rolin dhe përgjegjësitë e ASIG në krijimi e NSDI në Shqipëri, gjithashtu në fjalën e tij z. Çala vuri theksin në domosdoshmërinë që ka sot bashkëpunimi me botën akademike për të nxjerrë profesionistë të zotë në fushën e gjeoinformacionit, për të cilën ka aq shumë nevojë tregu.
Drejtori i drejtorisë së Gjeodezisë dhe Hartografisë i prezantoi studentët me projektet e kësaj drejtorie mbi ndërtimin e Kornizës Referuese Gjeodezike (KRGJSH) dhe Hartës Bazë të Shqipërisë.
Ndërsa drejtori i drejtorisë së GIS-it Kombëtar dhe Gjeoportalit, prezantoi të dhënat dhe shërbimet që ASIG ofron në Gjeoportalin Kombëtar, gjithashtu ai i njohu studentët me rolin dhe përgjegjësitë e ASIG në hartimin dhe zbatimin e standardeve sipas direktivës INSPIRE si dhe për rolin dhe përgjegjësitë e Autoriteteve Publike Përgjegjëse në mbledhjen, përpunimin dhe përditësimin e informacionit gjeohapësinor.
![](https://asig.gov.al/wp-content/uploads/2023/09/histofilologji2-1.jpg)
![](https://asig.gov.al/wp-content/uploads/2023/09/histofilologji3.jpg)
Takim mbi projektin “Informacioni Gjeohapësinor për zhvillimin e qëndrueshëm të territorit në zonën me intensitet të lartë zhvillimi Tiranë-Durrës” me JICA
Nën organizimin e JICA(Japan International Cooperation Agency), u mbajt më 23.05.2019, në ambientet e sallës Europa, takimi mbi ecurinë e projektit “Informacioni Gjeohapësinor për zhvillimin e qëndrueshëm të territorit në zonën me intensitet të lartë zhvillimi Tiranë-Durrës”. Në këtë takim ishin të pranishëm, shkëlqesia e tij ambasadori i Japonisë, Makoto Ito, përfaqësues të zyrës për Ballkanin të JICA, stafi i Autoriteti Shtetëror për Informacionin Gjeohapësinor (ASIG), si dhe profesorë dhe studentë të Universitetit Politeknik të Tiranës nga departamenti i Gjeodezisë.
Qëllimi i këtij takimi ishte paraqitja e ecurisë së projektit që ASIG po zhvillon me JICA, si dhe eksperienca që studentët praktikantë pranë ASIG, po marrin nga ky bashkëpunim në lidhje me ofrimin e njohurive bazë në fushën e hartografisë, fotogrametrisë dhe përdorimit të teknologjive bashkohore në fushën e gjeoinformacionit.
Në fjalën e tij përshëndetëse drejtori i përgjithshëm i ASIG z. Lorenc Çala falënderoi ekipin e JICA për punë e bërë deri tani në lidhje me këtë projekt, listoi disa arritje të finalizuara nga ky bashkëpunim, si dhe theksoi domosdoshmërinë që kanë shkëmbime të tilla eksperiencash si kjo me qeverinë japoneze, jo vetëm për institucionin e ASIG, por edhe për fushën akademike dhe brezin e ri të studentëve të gjeodezisë.
Shkëlqesia e tij ambasadori i Japonisë, Makoto Ito, në fjalën e tij vlerësoi mbështetjen që qeveria japoneze ka dhënë dhe do të japë për Shqipërinë, përgëzoi të dy ekipet e JICA dhe ASIG për punën e bërë në lidhje me projektin në fjalë, si dhe rëndësinë e krijimit të mundësive për eksperienca praktike për studentët e sapo diplomuar.
Në këtë takim përshëndetën gjithashtu përfaqësues të Universitetit Politeknik të Tiranës si dhe studentë të këtij universiteti të cilët me anë të një prezantimi paraqitën eksperiencën e tyre gjatë praktikës mësimore pranë ASIG, me ekipin e JICA.
![](https://asig.gov.al/wp-content/uploads/2023/09/ambasd_japoni2.jpg)
![](https://asig.gov.al/wp-content/uploads/2023/09/ambasd_japoni3.jpg)
![](https://asig.gov.al/wp-content/uploads/2023/09/ambasd_japoni4.jpg)
Workshop me temë, “ Hartëzimi i vlerësimit të riskut nga fatkeqësitë ”
Në workshop-in me temë, “ Hartëzimi i vlerësimit të riskut nga fatkeqësitë”, organizuar në kuadër të programit IPA-DRAM, në datat, 23–24 Prill 2019, në ambientet e Hotel Tirana International, morën pjesë edhe specialistë të Autoritetit Shtetëror për Informacionin Gjeohapësinor (ASIG) nga sektori i Standardeve të Gjeoinformacionit.
Qëllimi i këtij projekti është krijimi i sistemeve kombëtare efektive, koherente dhe të orientuara drejt BE-së, për grumbullimin e të dhënave, për humbjet në raste fatkeqësish natyrore, vlerësimi dhe hartëzimi e riskut si dhe shtrirja dhe integrimi në mekanizmin e mbrojtjes civile të Unionit Evropian.
Ky workshop kishte në fokus:
• Rishikimin dhe zhvillimin e 3 skenarëve për përmbytjet, tërmetet dhe zjarret.
• Diskutimin dhe konsolidimin e skenarëve për NDRA(Vlerësim i Riskut për Katastrofat Kombëtare).
• Përcaktimin e masave zbutëse në lidhje me skenarët e përcaktuar që shihen nga studimi i OSBE 2016.
• Hapat për përgatitjen e dokumentit formal, NDRA.