Shqip
English
Organizohet konferenca përmbyllëse e projektit SOFTMOVE
U zhvillua sot në Porta Futuro, Bari, Itali konferenca përmbyllëse e projektit SOFTMOVE me temë, “UAS, mësimet e nxjerra dhe perspektivat në zonën ndërkufitare IPA”.
Autoriteti Shtetëror për Informacionin Gjeohapësinor (ASIG) prej fillimit të vitit 2024 është partner në projektin SOFTMOVE së bashku me DTA Distretto Tecnologico Aerospaziale (Lead Partner, Rajoni i Puglias, Itali) dhe NVU Digital Den (Mal i Zi), të bashkë financuar nga Programi Interreg IPA South Adriatic 2021-2027, i Bashkimit Evropian nëpërmjet Instrumenteve të Para-Anëtarësimit (IPA III).
Projekti SOFTMOVE synon të ndërtojë marrëdhënie bashkëpunimi dhe partneritete ndërkombëtare që promovojnë përdorimin e teknologjisë Unmanned Aerial Vehicle (UAV), me fokus zbatimin e shërbimeve inovative ajrore dhe përdorimin e shërbimeve hapësinore, në mënyrë që të mund t’u përgjigjet nevojave të qytetarëve në qytetet inteligjente (smart cities), të zonës IPA.
Kjo konferencë ishte e organizuar në 5 sesione ku u prezantuan objektivat, rezultatet e punimeve të deritanishme (Workshop-e, seminare, takime B2B) nga ASIG, DTA dhe Digital Den. Gjatë këtij eventi u prezantuan Planet e Veprimit të Përbashkëta (Joint Action Plan-JAP) nga DTA-DD-ASIG (Fatjona Çilaj).
Pas këtij sesioni, u realizua firmosja e Memorandumit të Mirëkuptimit (MoU) nga secili partner, si një akt i përbashkët i bashkëpunimit të mëtejshëm midis partnerëve. Konferenca u shoqërua nga dy sesione të tjera me diskutime, dëshmi dhe prezantime ndërmjet Industrisë, Akademisë dhe pjesëmarrësve të përfshirë. Përfaqësues nga Shqipëria për Industrinë ishin profesorët nga Universiteti Politeknik i Tiranës, Prof. Alban Rakipi dhe Prof. Gledis Basha ndërsa nga industria kompania Geosensors me pjesëmarrjen e Ida Beqirit dhe Celestina Roshnikut.
Thirrje për pjesëmarrje në konkursin ndërkombëtar “Ecoview 2025”, një mundësi për të rinjtë mbi mjedisin dhe teknologjitë satelitore
Autoritetit Shtetëror për Informacionin Gjeohapësinor (ASIG) sjell në vëmendje të nxënësve të shkollave të mesme dhe komunitetit arsimor mundësinë për të marrë pjesë në konkursin ndërkombëtar “Ecoview 2025”, një nismë edukative në nivel global që synon të promovojë angazhimin e të rinjve në çështje të mjedisit dhe zhvillimit të qëndrueshëm përmes përdorimit të teknologjive Remote Sensing dhe të dhënave satelitore me akses të lirë.
Konkursi organizohet nga Qendra Kombëtare “Junior Academy of Sciences of Ukraine” dhe i drejtohet nxënësve të moshës 14–18 vjeç, të cilët ftohen të zhvillojnë projekte kërkimore mbi tema të zgjedhura mjedisore si ndryshimet klimatike, ndotja e ajrit, mbrojtja e pyjeve dhe e ujërave apo përdorimi i tokës, duke përdorur të dhëna reale nga burime satelitore.
Pjesëmarrësit do të kenë mundësinë të përfitojnë nga materiale orientuese, kurse online dhe trajnime virtuale të ofruara nga organizatorët përmes platformave të dedikuara.
Konkursi zhvillohet tërësisht online, në gjuhën angleze, dhe pjesëmarrja është falas.
Afatet e konkursit:
- Deri në 31 tetor 2025: Regjistrimi dhe dorëzimi i projektit
- 1 – 20 nëntor 2025: Vlerësimi i projekteve nga juria ndërkombëtare
- 5 dhjetor 2025: Prezantimi online i finalistëve në platformën Zoom
Si të aplikoni?
- Regjistrimi bëhet përmes formularit:
https://docs.google.com/forms/d/e/1FAIpQLSdoE_nhrdalgARfVNfpCqfFoY7lA9DXz0RAYVFj228_yqXAIA/viewform
- Projektet dorëzohen me email në adresën: gis_rs@man.gov.ua
- Për më shumë informacion, udhëzuesin zyrtar dhe burimet e trajnimit:
https://man.gov.ua/en/contests/mizhnarodnij-konkurs-ekopoglyad
Njohuritë e hapësirës për mundësi të reja biznesi
Përfaqësues të Autoriteti Shtetëror për Informacionin Gjeohapësinor (ASIG) morën pjesë në workshop-in e organizuar në kuadër të projektit SOFTMOVE me temë “Njohuritë e hapësirës për mundësi të reja biznesi” që u mbajt në Bari, Itali në datën 17 korrik 2025.
Gjatë këtij workshopi u prezantua puna e ASIG në lidhje me projektin e monitorimit të territorit me teknologji të avancuar dhe përdorimi i produkteve të përftuara nga kjo teknologji në fusha si mjedisi, emergjencat civile, fatkeqësitë natyrore, planifikimi urban etj..
Më tej fokusi kryesor ishte roli i aseteve hapësinore (EO, GNSS, SATCOM) në mundësimin e sistemeve ajrore autonome, duke dhënë njohuri të dobishme si për ata që janë në fazat e hershme të zhvillimit të një ideje biznesi, ashtu edhe për startup-et ekzistuese që kërkojnë të forcojnë aftësitë e tyre ose të lidhen me palët e interesuara lokale dhe partnerët ndërkombëtarë.
Gjithashtu gjatë prezantimit të startup-e në fushën e gjeohapësirës u demostruan mjete teorike dhe praktike për krijimin e biznesit, nga propozimi i vlerës dhe krijimi i markës, deri te pozicionimi në treg dhe komercializimi me raste përdorimi dhe shembuj konkretë nga dy sektorët kryesorë të këtij projekti.
