Takim me ekspertë lokal dhe ndërkombëtar të Agjencisë Zvicerane për Zhvillim dhe Bashkëpunim (SDC)
Drejtori i Përgjithshëm i Autoritetit Shtetëror për Informacionin Gjeohapësinor znj. Vilma Tomço zhvilloi në ambientet e ASIG, një takim pune me eksperten zvicerane znj. Lea Moser dhe z. Rikard Luka.
Objekti i këtij takimi ishte ndarja e pikëpamjeve mbi përmirësimin mëtejshëm të zbatimit të projektit Build Back Better në Shqipëri.
Ky projekt u implementua për herë të parë në kuadër të ndihmës që Qeveria Zvicerane ofroi për vendin tonë gjatë periudhës së rindërtimit, për të ndihmuar familjet e prekura nga tërmeti i vitit 2019, në bashkitë e Shijakut dhe Kurbinit.
Ky projekt vijon misionin e tij për të rivlerësuar nevojat aktuale prioritare të Shqipërisë, në nivel kombëtar dhe vendor dhe në të njëjtën kohë të identifikojë fushat për të kontribuar me asistencë teknike, masa/veprime për ngritjen e kapaciteteve për të përmirësuar më tej politikat dhe kuadrin institucional në përputhje me kodet e ndërtimit të BE-së si dhe për të mbështetur zbatimin e legjislacionit në lidhje me ndërtimin e ndërtesave të banimit në mënyrë që të përmirësohet parandalimi dhe të zvogëlohet rreziku.
Ndërhyrja e mundshme, që do të mbështetet nga Agjencia Zvicerane për Zhvillim dhe Bashkëpunim (SDC), do të jetë plotësisht në përputhje me objektivat dhe prioritetet strategjike të vlerësimit kombëtar të rrezikut dhe Strategjisë Kombëtare për Reduktimin e Rrezikut nga Fatkeqësitë 2023-2030, e cila u miratua së fundmi nga Qeveria Shqiptare.
![](https://asig.gov.al/wp-content/uploads/2023/09/sdc_2-1024x681.jpg)
![](https://asig.gov.al/wp-content/uploads/2023/09/sdc_3-1024x681.jpg)
ASIG merr pjesë në workshop-in e organizuar nga EUROSEA
Autoriteti Shtetëror për Informacionin Gjeohapësinor (ASIG), mori pjesë në workshop-in e organizuar online, në kuadër të projektit EUROSEA, projekt ky i financuar nga Bashkimi Evropian i cili ka për synim koordinimin në shkallë të gjerë, në kontinentin Evropian të agjencive kombëtare që menaxhojnë të dhënat oqeanografike dhe detare, duke kombinuar kapacitetet dhe përmbushur mangësitë ekzistuese në funksion të një sistemi vëzhgues ndërkombëtar.
Ky ishte edicioni i dytë i cili u zhvillua online më 4 dhe 5 maj në bashkëpunim me European Global Ocean Observing System (EuroGOOS). Nga ASIG morën pjesë në këtë workshop specialistë të sektorit të Kornizës Referuese Gjeodezike dhe sektorit të Infrastrukturës së Sistemeve CORS.
Gjatë këtij eventi u trajtuan çështjet e mëposhtme:
- Pasqyra globale e rrjeteve, bazës së të dhënave dhe portaleve të të dhënave;
- Statusi dhe mundësitë e ardhshme të teknikës GNSS-IR;
- Rastet studimore të bazuara në të dhënat e matësve të baticës-zbaticës (Zona e Mesdheut);
- Kontrolli automatik i cilësisë dhe përpunimit të të dhënave (në kohë reale dhe modaliteti i vonesës).
Grupi i specialistëve të ASIG që morri pjesë në këtë event u njoh me të rejat më të fundit, situatën e përgjithshme dhe angazhimet në të ardhmen duke vendosur gjithashtu kontakte me homologët e tjerë pjesëmarrës në këtë workshop.
![](https://asig.gov.al/wp-content/uploads/2023/10/eurosea2-1024x681.jpg)
![](https://asig.gov.al/wp-content/uploads/2023/10/eurosea3-1024x618.jpg)
![](https://asig.gov.al/wp-content/uploads/2023/10/eurosea4-1024x768.jpg)
![](https://asig.gov.al/wp-content/uploads/2023/10/eurosea5-1024x768.jpg)
![](https://asig.gov.al/wp-content/uploads/2023/10/eurosea6-1024x695.jpg)
Vijon puna për krijimin e hartës topografike të shkallës 1:2000
Sektori i Hartografisë pranë Autoritetit Shtetëror për Informacionin Gjeohapësinor, në vijim të plotësimit të hartës topografike të shkallës 1:2 000, është në proces pune për përgatitjen e të dhënave për një sipërfaqe prej 49 km², e cila shtrihet në pjesën lindore të qytetit të Tiranës dhe pjesën veriore të qytetit të Durrësit.
Gjatë muajit prill ky sektor ka përfunduar fazën e verifikimit të të dhënave në terren, me qëllim rritjen e cilësisë dhe plotësimin e datasete-ve me elemente të cilat kanë në përmbajtjen e tyre atributet përkatëse për secilën shtresë gjeoinformacioni.
Informacioni i mbledhur në terren konsiston në veçoritë e të dhënave topografike të mëposhtme si:
- Verifikimin e veprave hidrike si ura, tombino, prita, përcaktimin e tipologjive të kanaleve, përrenjve, ujëmbledhësve, lumenjve etj.;
- Saktësimin dhe klasifikimin e objekteve të ndryshme si objekte banimi, industriale, bujqësore, administrative, fetare, arsimore etj.;
- Mbledhjen dhe saktësimin e emërtimeve gjeografike për qendra të banuara, ndërtesa, etj., bazuar në specifikimet teknike për krijimin e hartës topografike të shkallës 1: 2 000.
![](https://asig.gov.al/wp-content/uploads/2023/09/sek_hartografia_2-768x1024.jpg)
![](https://asig.gov.al/wp-content/uploads/2023/09/sek_hartografia_3.jpg)
![](https://asig.gov.al/wp-content/uploads/2023/09/sek_hartografia_4-768x1024.jpg)
![](https://asig.gov.al/wp-content/uploads/2023/09/sek_hartografia_5-821x1024.jpg)
![](https://asig.gov.al/wp-content/uploads/2023/09/sek_hartografia_6-1024x768.jpg)
![](https://asig.gov.al/wp-content/uploads/2023/09/sek_hartografia_7-768x1024.jpg)
Zhvillohet takim mes ASIG dhe ESRI
Autoritetit Shtetëror për Informacionin Gjeohapësinor (ASIG), në funksion të projekteve me teknologji të avancuara satelitore që po zhvillon së fundmi, pati dje një takim informues me ekspertët e Esri-t, z. Nick Sutherland (Esri European Defence and Intelligence BDM), z. Anthony Giles (Solution Engineer Esri European National Government) dhe GDI Albania.
Esri është kompania lider e tregut global për softuerët e sistemit të informacionit gjeografik (GIS), inteligjencës së vendndodhjes dhe hartave. Që nga viti 1969, kjo kompani mbështet qeveritë, bizneset dhe akademitë me Sisteme Informatike Gjeografike në të gjithë botën. Ekspertët e Esrit në prezantimet e tyre sollën informacion mbi aplikimet e ArcGIS në fushën e imazherisë inteligjente (burime nga imazhet satelitore dhe dron), të gjitha risitë, idetë e ndryshme, këshilla mbi platformën Esri dhe zgjidhjet që ajo ofron.
![](https://asig.gov.al/wp-content/uploads/2023/09/esri_2-1024x681.jpg)
![](https://asig.gov.al/wp-content/uploads/2023/09/esri_3-1024x681.jpg)
Trajnimi i autoriteteve publike përgjegjëse mbi përdorimin e Gjeoportalit Kombëtar dhe standardizimin e të dhënave gjeohapësinore
Autoriteti Shtetëror për Informacionin Gjeohapësinor (ASIG) pas përfundimit me sukses të projektit për përmirësimin e sistemit të Gjeoportalit Kombëtar,ka ndërmarrë nismën për rritjen e kapaciteteve teknike të stafeve të autoriteteve publike përgjegjëse për gjeoinformacionin.
Trajnimi fokusohet në tematikat e mëposhtme:
- Përdorimin e moduleve dhe funksionaliteteve të reja të sistemit të përmirësuar të Gjeoportalit Kombëtar;
- Përdorimin e shtresave bazë për krijimin dhe përditësimin e të dhënave gjeohapësinore nga aplikimet GIS duke përdorur shërbimet e rrjetit të Gjeoportalit Kombëtar;
- Harmonizimin dhe standardizimin e të dhënave gjeohapësinore sipas temave të gjeoinformacionit;
- Ndërveprimin e gjeoportalit me sistemet GIS që autoritetet publike administrojnë.
Ekspertë të ASIG nga sektorët e GIS-it Kombëtar, Gjeoportalit Kombëtar dhe Standardet e Gjeoinformacionit, në vijim të kësaj nisme kanë zhvilluar trajnime me autoritetet publike përgjegjëse si më poshtë:
- Agjencinë e Menaxhimit të Burimeve Ujore (AMBU);
- Agjencinë Kombëtare të Burimeve Natyrore (AKBN);
- Agjencinë Kombëtare të Mbrojtjes Civile (AKMC);
- Agjencinë Kombëtare të Zonave të Mbrojtura (AKZM);
- Agjencinë Shtetërore të Kadastrës (ASHK);
- Institutin e Gjeoshkencave (IGJEO).
![](https://asig.gov.al/wp-content/uploads/2023/09/trajnimi2023_2-1024x576.jpg)
![](https://asig.gov.al/wp-content/uploads/2023/09/trajnimi2023_3-1024x576.jpg)
![](https://asig.gov.al/wp-content/uploads/2023/09/trajnimi2023_4-1024x576.jpg)
![](https://asig.gov.al/wp-content/uploads/2023/09/trajnimi2023_5-1024x576.jpg)
ASIG merr pjesë në Asamblenë e Përgjithshme të EuroGeographics
Drejtues të ASIG marrin pjesë në Asamblenë e Përgjithshme të EuroGoegraphics 2023 e cila po zhvillohet në Maltë, në datat 20 dhe 21 mars.
Kjo asamble ka në fokusin e saj këtë vit Inteligjencën Artificiale dhe ndikimi i saj në sektorin e të dhënave gjeohapësinore. Gjithashtu mes anëtarëve të EuroGeographics po diskutohen tema të cilat janë të harmonizuara me fushat e agjendës së BE-së siç janë:
- Grupet e të dhënave me vlerë të lartë
- Etika e të dhënave
- Burime për të ardhmen
- Të dhënat e hapura për hartat kadastrale
- Bashkëpunimi mes autoriteteve ushtarake dhe civile për mbledhjen e të dhënave gjeohapësinore
![](https://asig.gov.al/wp-content/uploads/2023/09/takim_eurogeographics_2.jpg)
![](https://asig.gov.al/wp-content/uploads/2023/09/takim_eurogeographics_3.jpg)
Video informuese mbi shërbimin “Street view 360º”
Në kuadër të projektit për përmirësimin e sistemit të Gjeoportalit Kombëtar të ASIG, është mundësuar integrimi i shërbimit “Street view 360º” në këtë gjeoportal.
Ky shërbim ofron mbulimin me fotografi 360 º të gjeoreferencuara, për infrastrukturën rrugore në territorin e Republikës së Shqipërisë. Përpunimi i fotove imazherike është kryer me software desktop të cilët kryejnë përpunimin, pozicionimin e saktë të imazheve dhe ngarkimin e të dhënave në një webserver. Përdoruesit do të mund të aksesojnë databazën e fotografive nëpërmjet internetit në Gjeoportalin Kombëtar dhe do ti kenë të pozicionuara qendrat e fotografive një hartë/ortofoto online për një orientim sa më të thjeshtë si dhe do të vizualizojnë fotografitë 360 gradë ku mund të kryejnë identifikim të elementëve të ndryshëm.
Aplikacioni “Street view 360º” ofron shumë lehtësira për ndërtimin e databazës me fotografi panoramike të gjeoreferencuara për monitorimin dhe identifikimin e gjendjes së infrastrukturës rrugore në Republikën së Shqipërisë. Nëpërmjet kësaj databaze imazherike mund të realizohet me efektivitet të lartë dhe me kosto të ulët:
- Kontrolli i mirëmbajtjes së akseve rrugore të cilat i janë kontraktuar operatorëve ekonomike.
- Kontrolli i investimeve të kryera në akse rrugore (sinjalistikë , gjelbërim, ndriçim, etj.)
- Përcaktimi i zonave të cilat kërkojnë ndërhyrje në kuadër të mirëmbajtjes.
- Përcaktimi i investimeve në akset rrugore në të cilën nuk janë kryer investime.
Për t’iu njohur më shumë me këtë shërbim më poshtë gjeni videon informuese të përgatitur nga ASIG.
Video informuese mbi shërbimin “Street view 360º”
ASIG anëtarësohet në Copernicus Relay
Në fillim të muajit shkurt Autoriteti Shtetëror për Informacionin Gjeohapësinor (ASIG), është bërë pjesë e rrjetit Copernicus Relay.
Anëtarët e këtij komuniteti të ri janë përfaqësuesit e Copernicus në terren dhe do të promovojnë përfitimet e programit të BE-së për vëzhgimin e Tokës.
Si pjesë e Strategjisë Hapësinore për Evropën, Komisioni Evropian ka krijuar këtë rrjet të ambasadorëve të Copernicus i cili ekziston që prej vitit 2017.
Anëtarët e këtij rrjeti veprojnë si pika kontakti lokale dhe rajonale duke koordinuar dhe promovuar aktivitetet në të gjithë programin Copernicus, si dhe përfitimet dhe mundësitë e tij për bizneset dhe publikun vendas.
![](https://asig.gov.al/wp-content/uploads/2023/09/copernicus-1-1024x603.png)
Mbledhje e Bordit të Informacionit Gjeohapësinor, datë 01.02.2023
U zhvillua në ambientet e sallës Europa, më 01.02.2023, nën drejtimin e Drejtorit të Përgjithshëm të ASIG, znj. Vilma Tomço, mbledhja e Bordit të Informacionit Gjeohapësinor (BIG).
Në mbledhje ishin të pranishëm të gjithë anëtarët e Bordit të Informacionit Gjeohapësinor.
Ekspertët e ASIG me anë të prezantimeve të tyre i njohën anëtarët e BIG me ndryshimet e fundit ligjore të cilat prekin fushën e veprimtarisë së ASIG, projektin e shërbimeve satelitore dhe risitë e Gjeoportalit Kombëtar.
![](https://asig.gov.al/wp-content/uploads/2023/09/mbledhje_bordit2.jpg)
![](https://asig.gov.al/wp-content/uploads/2023/09/mbledhje_bordit3.jpg)
![](https://asig.gov.al/wp-content/uploads/2023/09/mbledhje_bordit4.jpg)
Zhvillohet takim mes ASIG dhe përfaqësuesve të Satellogic USA Inc
Përfaqësues të Autoritetit Shtetëror për Informacionin Gjeohapësinor, të kryesuar nga Drejtori i Përgjithshëm znj. Vilma Tomço, në datën 19.01.2023, zhvilluan një takim me përfaqësuesit e kompanisë Satellogic, në kuadër të realizimit të projektit “Për realizimin e Shërbimit Satelitor për monitorimin me teknologji të avancuar të territorit të Republikës së Shqipërisë”.
Në këtë takim u diskutua për ecurinë e bashkëpunimit, aktivitetet e realizuara deri më tani, dhe hapat që duhet të ndiqen në të ardhmen për plotësimin e nevojave të institucioneve shqiptare, për monitorimin me teknologji të avancuar të territorit të Republikës së Shqipërisë.
![](https://asig.gov.al/wp-content/uploads/2023/09/takimi_me_perfaqesuesit_satellogc2-1024x680.jpg)
![](https://asig.gov.al/wp-content/uploads/2023/09/takimi_me_perfaqesuesit_satellogc3-1024x679.jpg)