Shqip
English
ASIG organizoi aktivitetin “Gratë në Teknologjitë Gjeohapësinore – Histori Suksesi”
Më 2 prill 2026, në ambientet e Europe House, Tiranë, Autoriteti Shtetëror për Informacionin Gjeohapësinor (ASIG) organizoi aktivitetin “Gratë në Teknologjitë Gjeohapësinore – Histori Suksesi”, në kuadër të nismave për promovimin e rolit dhe kontributit të grave në fushën e teknologjive gjeohapësinore.
Aktiviteti mblodhi së bashku përfaqësuese nga institucionet publike, akademia dhe sektori privat, të cilat ndanë përvojat e tyre profesionale, sfidat e hasura gjatë rrugëtimit të tyre, si dhe perspektivat mbi zhvillimin e kësaj fushe në Shqipëri. Përmes këtij bashkëbisedimi u vunë në pah jo vetëm arritjet individuale dhe institucionale, por edhe rëndësia e përfshirjes së grave në sektorë të lidhur ngushtë me teknologjinë, inovacionin dhe përdorimin e të dhënave gjeohapësinore.
Për ASIG, ky aktivitet përbënte një mundësi të rëndësishme për të sjellë në vëmendje kontributin e grave në zhvillimin e gjeoinformacionit, si dhe për të nxitur interesin e vajzave dhe grave për t’u orientuar drejt kësaj fushe. Nëpërmjet historive të suksesit, përvojave konkrete dhe mesazheve frymëzuese të ndara gjatë aktivitetit, u promovua një qasje më inkurajuese dhe më gjithëpërfshirëse ndaj pjesëmarrjes së grave në teknologjitë gjeohapësinore.
ASIG mbetet i angazhuar për të mbështetur nisma që promovojnë zhvillimin e kapaciteteve, fuqizimin profesional dhe krijimin e mundësive të reja për përfshirjen e grave në fusha me rëndësi strategjike për zhvillimin e vendit.
ASIG merr pjesë në eventin Munich Space Summit
Përfaqësues të Autoritetit Shtetëror për Informacionin Gjeohapësinor (ASIG) morën pjesë në samitin Munich Space Summit, i cili u zhvillua në Munich të Gjermanisë, në datat 23-27 Mars, një platformë ndërkombëtare që bashkon aktorët kryesorë të industrisë gjeohapësinore për të adresuar zhvillimet dhe sfidat më të fundit të këtij sektori.
Gjatë samitit u trajtuan çështje me rëndësi strategjike, përfshirë politikat hapësinore, dimensionin gjeopolitik, inovacionin teknologjik dhe bashkëpunimin ndërinstitucional. Vëmendje e veçantë iu kushtua aplikimit të inteligjencës artificiale në orbitë (Edge AI in orbit), e cila mundëson përpunimin e avancuar të të dhënave në kohë reale, direkt në satelit.
Diskutimet theksuan gjithashtu rolin kyç të të dhënave satelitore në mbështetje të vendimmarrjes së informuar, si dhe rëndësinë e garantimit të sigurisë së të dhënave në një ekosistem në zhvillim të shpejtë.
Në fokus ishin edhe zhvillimet në sektorin “New Space”, përfshirë avancimet në teknologjitë CubeSat dhe platformat moderne satelitore.
Pjesëmarrja në këtë event përfaqëson një mundësi të rëndësishme për informim, shkëmbim njohurish dhe krijim bashkëpunimesh në një industri me rëndësi strategjike në rritje.
ASIG merr pjesë në Panairin e Karrierës 2026 në Universitetin POLIS
Autoriteti Shtetëror për Informacionin Gjeohapësinor (ASIG) merr pjesë në Panairin e Karrierës 2026, që po zhvillohet sot, më 26 mars 2026, në Universitetin POLIS. Pjesëmarrja në këtë aktivitet realizohet në kuadër të promovimit të veprimtarisë së ASIG dhe forcimit të bashkëpunimit me institucionet e arsimit të lartë, me synim informimin e studentëve mbi rolin e informacionit gjeohapësinor dhe mundësitë e zhvillimit profesional në këtë fushë.
Gjatë panairit, përfaqësuesit e ASIG prezantojnë veprimtarinë e institucionit, angazhimin e tij në administrimin dhe zhvillimin e informacionit gjeohapësinor në Shqipëri, si edhe mundësitë për përfshirjen e studentëve në praktika profesionale dhe procese të ngritjes së kapaciteteve. Pjesëmarrja e ASIG në aktivitete të tilla kontribuon në afrimin e të rinjve me sektorin e gjeoinformacionit dhe në nxitjen e interesit për teknologjitë dhe shërbimet gjeohapësinore.
Nënshkruhet marrëveshja e bashkëpunimit mes ASIG dhe AZHBR
Autoriteti Shtetëror për Informacionin Gjeohapësinor (ASIG) dhe Agjencia për Zhvillim Bujqësor dhe Rural (AZHBR) nënshkruan një marrëveshje bashkëpunimi me qëllim forcimin e koordinimit institucional për përdorimin dhe shkëmbimin efektiv të informacionit gjeohapësinor, në funksion të krijimit dhe zhvillimit të Sistemit të Identifikimit të Parcelave të Tokës (LPIS).
Ky sistem i integruar do të shërbejë për identifikimin dhe menaxhimin e zonave bujqësore përmes ortofotove, imazheve satelitore dhe të dhënave të tjera gjeohapësinore, në përputhje me kërkesat e politikës së përbashkët bujqësore të Bashkimit Evropian.
Zbatimi i kësaj marrëveshjeje përfaqëson një hap të rëndësishëm drejt forcimit të infrastrukturës kombëtare të informacionit gjeohapësinor dhe përmbushjes së standardeve evropiane në sektorin bujqësor, duke kontribuar në digjitalizimin dhe modernizimin e administrimit të skemave në bujqësi.
Trajnim me stafin teknik të Drejtorisë së Përgjithshme të Gjendjes Civile
Autoriteti Shtetëror për Informacionin Gjeohapësinor(ASIG) në kuadër të bashkëpunimit ndërinstitucional dhe nismës për rritjen e kapaciteteve në menaxhimin dhe përdorimin e informacionit gjeohapësinor, zhvilloi sot një trajnim të dedikuar për stafin teknik të sektorit të Administrimit të Regjistrit Kombëtar të Adresave, të Drejtorisë së Përgjithshme të Gjendjes Civile.
Gjatë këtij trajnimi, ASIG ofroi asistencë teknike për standardizimin dhe saktësimin e të dhënave GIS për temën “Sistemi i adresave”, si dhe trajtoi aspektet e përdorimit praktik të Gjeoportalit Kombëtar për aksesimin, menaxhimin dhe vizualizimin e të dhënave gjeohapësinore.
Vizitë e përfaqësuesve të EuroGeographics në ASIG
Përfaqësues të lartë drejtues të EuroGeographics znj. Sallie Payne Snell, Sekretare e Përgjithshme dhe Drejtoreshë Ekzekutive e EuroGeographics, dhe znj. Patricia Sokacova, menaxhere e Anëtarësimit dhe Komunikimit zhvilluan sot një vizitë në ambientet e ASIG.
Drejtori i Përgjithshëm znj. Vilma Tomço pasi prezantoi progresin e ASIG i njohu gjithashtu ato me zhvillimin dhe konsolidimin e infrastrukturës kombëtare të informacionit gjeohapësinor, shërbimet digjitale dhe iniciativat strategjike të ASIG në fushën e gjeoinformacionit.
Takimi shërbeu gjithashtu si një mundësi shkëmbimi pikëpamjesh mes ASIG dhe EuroGeographics mbi perspektivat e bashkëpunimit në të ardhmen, forcimin e kapaciteteve institucionale dhe harmonizimin me standardet evropiane në menaxhimin dhe shpërndarjen e të dhënave gjeohapësinore.
Kjo vizitë përfaqëson një hap të rëndësishëm drejt thellimit të marrëdhënieve ndërinstitucionale dhe integrimit të mëtejshëm të ASIG në rrjetet evropiane të gjeoinformacionit.
Zhvillohet takim mes ASIG dhe përfaqësuesve të Misionit Këshillimor të Mekanizmit Evropian të Mbrojtjes Civile (UCPM)
Përfaqësues të Autoritetit Shtetëror për Informacionin Gjeohapësinor (ASIG) zhvilluan dje në bashkëpunim me Agjencinë Kombëtare të Mbrojtjes Civile (AKMC), një takim me përfaqësues të Misionit Këshillimor të Mekanizmit Evropian të Mbrojtjes Civile (UCPM), me fokus rolin dhe kontributin e produkteve të shërbimit satelitor në menaxhimin e emergjencave civile.
Gjatë diskutimeve u theksua rëndësia e përdorimit të të dhënave satelitore për evidentimin e dëmeve të shkaktuara nga zjarret, si dhe për parandalimin dhe zbulimin e hershëm të tyre, si një mjet kyç për rritjen e gatishmërisë dhe reagimit efektiv ndaj fatkeqësive natyrore.
Ky bashkëpunim përforcon angazhimin e përbashkët të këtyre institucioneve për forcimin e kapaciteteve kombëtare dhe përdorimin e teknologjive avancuara në shërbim të mbrojtjes së jetës, mjedisit dhe pronës.
NJOFTIM I RËNDËSISHËM
Të Dhëna ➝ Të dhënat e përgatitura
(www.geoportal.asig.gov.al)
Për përdorim korrekt të shërbimit ATOM dhe shkarkim të suksesshëm të të dhënave, rekomandohet përdorimi i shfletuesit Mozilla Firefox. Funksionimi i shërbimit në shfletues të tjerë nuk garantohet plotësisht.
ASIG merr pjesë në workshop-in e organizuar në kuadër të projektit EBSEC
Përfaqësues të Autoritetit Shtetëror për Informacionin Gjeohapësinor (ASIG) nga Drejtoria e Përpunimit të të Dhënave Remotsensing, morën pjesë në workshop-in me temë “Përmirësimi i sigurisë kufitare kroate përmes integrimit të vëzhgimit tokësor satelitor dhe operacioneve tradicionale të survejimit nga organet e rendit” organizuar në kuadër të projektit Earth Observation for Border Security “EBSEC”.
Ky workshop u zhvillua në ambientet e Institutit “Ruđer Bošković” (RBI), Zagreb, Kroaci në datat 10–11 dhjetor 2025 dhe kishte si qëllim rritjen e njohurive dhe shkëmbimin e përvojave mbi përdorimin e vëzhgimit të tokës (EO-Earth Observation), sistemeve GIS dhe analizave gjeohapësinore në sigurinë kufitare dhe menaxhimin e migracionit të paligjshëm.
Ky aktivitet dy ditor bëri bashkë përfaqësues të institucioneve shtetërore, akademike dhe organizatave ndërkombëtare nga rajoni dhe më gjerë, për të diskutuar integrimin e të dhënave satelitore me metodat tradicionale të zbatimit të ligjit. Aktivitetin u hap me fjalën përshëndetëse të përfaqësuesve të Institutit Ruđer Bošković, ESA (European Space Agency) dhe drejtuesve të projektit EBSEC, duke vijuar me prezantimin e aktiviteteve kërkimore të ESA në fushën e sigurisë dhe një pasqyrë të rezultateve të projektit EBSEC.
Përfaqësuesi i ASIG i njohu të pranishmit me aktivitetin e këtij institucioni, arritjet e deritanishme në fushwn e gjeoinformacionit si dhe prezantimin e materialit mbi “Sfidat dhe mundësitë aktuale në menaxhimin e migracionit në Shqipëri, me fokus në Imazherinë Satelitore dhe kontributin e saj në sigurinë e kufirit.
ASIG merr pjesë në Konferencën Ndërkombëtare OGC iDays 2025
Përfaqësues të Autoritetit Shtetëror për Informacionin Gjeohapësinor (ASIG) morën pjesë në Konferencën Ndërkombëtare OGC iDays 2025, e organizuar nga Open Geospatial Consortium (OGC), në Frankfurt, Gjermani, me fokus në zhvillimet më të fundit në fushën e të dhënave gjeohapësinore, inteligjencës artificiale dhe Digital Twins.
Konferenca bëri bashkë institucione të rëndësishme evropiane e ndërkombëtare, ekspertë të gjeoinformacionit të cilët adresuan tema si INSPIRE 2.0, European Data Spaces, Smart Cities, Digital Twin dhe diskutuan mbi rolin e teknologjive gjeohapësinore në mbështetje të planifikimit, klimës dhe vendimmarrjes publike.
Pjesëmarrja e ASIG në këtë aktivitet forcoi angazhimin e institucionit për harmonizimin me politikat dhe standardet evropiane, si dhe për zhvillimin e një infrastrukture moderne gjeohapësinore në shërbim të qytetarëve dhe institucioneve publike.
