Category Archives: Trajnime

Autoriteti Shtetëror për Informacionin Gjeohapësinor (ASIG) dhe Shkolla Shqiptare e Administratës Publike(ASPA) zhvilluan dje më 20.11.2025, trajnimin me temë “Infrastruktura Kombëtare e Ofrimit të të Dhënave dhe Shërbimeve Gjeohapësinore”.

ASIG dhe ASPA në kuadër të marrëveshjes së bashkëpunimit  ndërmjet tyre kanë realizuar hartimin e kurrikulave të specializuara për rritjen e kapaciteteve të stafeve teknike në fushën e gjeoinformacionit për administratën publike.

Trajnimi ishte i fokusuar në strukturën dhe funksionimin e infrastrukturës kombëtare të të dhënave gjeohapësinore (NSDI), rolin e saj në harmonizimin dhe shpërndarjen e të dhënave, si dhe përgjegjësitë institucionale në këtë proces. Gjatë këtij sesioni u demonstruan në mënyrë praktike funksionalitetet kryesore të Gjeoportalit Kombëtar, duke përfshirë kërkimin, vizualizimin, përdorimin dhe shkarkimin e të dhënave gjeohapësinore, si dhe mënyrat e standardizimit të të dhënave për publikim, vizualizim dhe menaxhim përmes përdorimit të shërbimeve të rrjetit. Pjesëmarrësit u njohën me rëndësinë e strukturimit të saktë të metadatave, si dhe rolin që NSDI luan në rritjen e cilësisë, interoperabilitetit dhe aksesueshmërisë së të dhënave gjeohapësinore në nivel kombëtar.

Ky trajnim kontribuon në forcimin e kapaciteteve institucionale dhe në zgjerimin e përdorimit të infrastrukturës kombëtare të të dhënave gjeohapësinore për planifikim, menaxhim të territorit dhe zhvillimin e shërbimeve publike digjitale të bazuara në të dhëna të sakta dhe të qëndrueshme.

Ekspertë të Autoritetit Shtetëror për Informacionin Gjeohapësinor(ASIG) zhvilluan në datat  22–23 shtator 2025, në Korçë një trajnim intensiv me stafet teknike të Shoqërisë Rajonale Ujësjellës–Kanalizime Korçë.

Ky trajnim ishte i përqendruar në rritjen e aftësive praktike për mbledhjen, përpunimin dhe publikimin e informacionit gjeohapësinor. Programi u fokusua në krijimin dhe standardizimin e të dhënave të rrjetit të ujësjellës-kanalizimeve sipas standardit teknik të gjeoinformacionit “Infrastruktura Urbane dhe Shërbimet Qeveritare”, si edhe në përdorimin e Gjeoportalit Kombëtar në lidhje me ngarkimin, përditësimin dhe shpërndarjen e të dhënave gjeohapësinore.

Seancat praktike konsoliduan metodat për modelimin e shtresave tematike, kontrollin e cilësisë, plotësimin e metadatave, unifikimin e skemave, dhe qartësimin e hapave të publikimit në Gjeoportalin Kombëtar, duke garantuar ndërveprueshmëri dhe përputhje me legjislacionin në fuqi.

Trajnimi mbuloi të gjithë ciklin “nga terreni në publikim”, duke pajisur ekipet teknike me mjete konkrete për menaxhimin efikas të të dhënave të infrastrukturës së ujit dhe kanalizimeve. Hapat vijues parashikojnë asistencë teknike për konsolidimin e skemave të të dhënave dhe integrimin e plotë të rrjedhave të punës në Gjeoportalin Kombëtar.

Ekspertë të Autoritetit Shtetëror për Informacionin Gjeohapësinor (ASIG) zhvilluan më 19 shtator 2025, në ambientet e Agjencisë për Zhvillim Bujqësor dhe Rural (AZHBR), një trajnim të dedikuar për përdorimin e platformës së Gjeoportalit Kombëtar.

Fokus i këtij trajnimi ishin funksionalitetet operative të platformës, përfshirë kërkimin tematik, vizualizimin dhe kombinimin e shtresave, përdorimin e shërbimeve të rrjetit, shkarkimin e të dhënave dhe menaxhimin e aksesit sipas roleve të përdoruesve. Gjatë trajnimit u demonstruan skenarë praktikë të përdorimit në mbështetje të proceseve të punës së AZHBR-së dhe u theksuan praktikat për të siguruar gjurmueshmëri, transparencë dhe cilësi të të dhënave.

Aktiviteti kontribuoi në forcimin e kapaciteteve teknike të stafit dhe në zbatimin e praktikave të mira të përdorimit të Gjeoportalit Kombëtar si infrastrukturë qendrore për informim dhe vendimmarrje.

Autoriteti Shtetëror për Informacionin Gjeohapësinor (ASIG) zhvilloi në datat 31 korrik dhe 1 gusht 2025, trajnim me stafin teknik të Shoqërinë Rajonale Ujësjellës–Kanalizime Shkodër, si dhe ofrimin e asistencës teknike për Bashkinë Malësi e Madhe me qëllim rritjen e kapaciteteve teknike të institucioneve vendore në fushën e informacionit gjeohapësinor.

Në bashkëpunim me Shoqërinë Rajonale Ujësjellës–Kanalizime Shkodër, u zhvillua një trajnim i dedikuar për stafet teknike me fokus  krijimin dhe përpunimin e të dhënave për rrjetin e ujësjellës-kanalizimeve, në përputhje me standardin shtetëror për specifikimet teknike të informacionit gjeohapësinor në Shqipëri për temën: “Infrastruktura Urbane dhe Shërbimet Qeveritare”. Gjatë këtij trajnimi u prezantuan gjithashtu funksionalitetet e Gjeoportalit Kombëtar, si platformë zyrtare për publikimin dhe shpërndarjen e të dhënave gjeohapësinore.

Për stafin teknik të Bashkisë Malësi e Madhe, u ofrua asistencë me fokus në përditësimin e rrjetit rrugor lokal dhe identifikimin e pikave të interesit në territorin administrativ. Mbështetja përfshiu orientim për grumbullimin, strukturimin dhe standardizimin e të dhënave territoriale, me synim integrimin e tyre në Gjeoportalin Kombëtar dhe përdorimin në funksion të planifikimit dhe administrimit vendor.

Këto aktivitete kontribuan në përforcimin e kapaciteteve institucionale dhe në përmirësimin e cilësisë dhe aksesueshmërisë së të dhënave gjeohapësinore, në përputhje me kuadrin ligjor dhe standardet kombëtare të qeverisjes së informacionit gjeohapësinor.