Përfaqësues të Autoritetit Shtetëror për Informacionit Gjeohapësinor (ASIG) morën pjesë në workshopin me temë “Përdorimi i GIS, RS dhe UAV në pylltari precize”, i organizuar nga Departamenti i Gjeografisë në Fakultetin e Historisë dhe të Filologjisë, Universiteti i Tiranës, në kuadër të projektit kombëtar të teknologjisë dhe inovacionit për monitorimin dhe parashikimin e shëndetit pyjor në Parkun Kombëtar Divjakë-Karavasta.

Materiali i prezantuar nga ASIG  me temë “Gjeoinformacioni për shëndetin pyjor”,  theksoi rolin e të dhënave gjeohapësinore në monitorimin dhe menaxhimin e ekosistemeve pyjore, për ruajtjen e biodiversitetit dhe forcimin e qëndrueshmërisë mjedisore.

Ky bashkëpunim kontribuon në rritjen e kapaciteteve për përdorimin e teknologjive inovative në menaxhimin efektiv të zonave të mbrojtura dhe forcimin e vendimmarrjes me bazë shkencore.

Në vazhdën e aktiviteteve që po zhvillohen në kuadër të projektit SOFTMOVE ku ASIG është partner, u zhvilluan më 3 dhe 4 Qershor takime B2B në qytetin e Barit, Itali.

Përfaqësues të Autoritetit Shtetëror për Informacionin Gjeohapësinor nga Sektori i Projekteve bënë bashkë në këto takime një grup ekspertësh, menaxherësh projektesh, sipërmarrës të ndryshëm nga Shqipëria që kanë të bëjnë me Unmanned Aeria Systems (UAS) ku në fokus ishin dy tema kryesore:

• Ofrimi i shërbimeve Lifestyle – Zhvillimi i një kulture të re të transportit të biznesit;
• Integrimi i transportit publik dhe politikave urbane në menaxhimin e Qyteteve Inteligjente.

Në prezantimin e tij gjatë këtij takimi z. Kleart Shuli nga ASIG i njohu të pranishmit me punën e bërë nga ky institucion në mbledhjen, përpunimin, përditësimin dhe aksesueshmërinë e të dhënave gjeohapësinore, rëndësinë që ato kanë për vendimmarrje të drejta në sektorë të ndryshëm si planifikimi urban, turizmi, mbrojtja e mjedisit, siguria kombëtare, rimëkëmbja nga fatkeqësitë etj..

Pjesë e rëndësishme e këtyre diskutimeve ishte roli transformues i Sistemeve Ajrore pa Pilot (UAS) dhe përdorimi i tyre në qytetet inteligjente, duke nxitur inovacionin dhe zgjidhjet praktike për sfidat urbane.

Ekipet përfaqësuese nga Shqipëria, Italia dhe Mali i Zi gjatë këtyre dy ditëve patën mundësi të shkëmbejnë idetë dhe praktikat më të mira mbi çështje si mobiliteti inteligjent, digjitalizimi i shërbimeve dhe nevojat e qytetarëve lidhur me transportin urban.

ASIG së bashku me partnerët e tij mbetet i angazhuar për të forcuar bashkëpunimin ndërkufitar dhe për të shfrytëzuar potencialin e plotë të teknologjisë gjeohapësinore dhe UAS për zhvillimin e qyteteve inteligjente.

U zhvillua me sukses takimi i dytë i Grupit Teknik të Koordinimit (TCG) organizuar nga AKMC në bashkëpunim me JICA, në kuadër të zbatimit të projektit “Ndërtimi i Kapaciteteve për Sistemin Kombëtar të Informacionit për Zjarret në Pyje (NFFIS) dhe Zgjidhjeve të Bazuara në Natyrë”. Ky sistem inovativ synon të forcojë kapacitetet e Shqipërisë në parandalimin, monitorimin dhe reagimin ndaj zjarreve në pyje. NFFIS do të jetë një platformë digjitale që siguron paralajmërim të hershëm, monitorim në kohë reale dhe raportim të standardizuar të zjarreve në pyje, duke ndihmuar në vendimmarrje të shpejtë dhe efikase.

Gjatë takimit u diskutua për progresin e deritanishëm, përgatitjen e dokumenteve teknike e metodologjinë, si dhe sfidat në mbledhjen e të dhënave nga institucionet përkatëse. U theksua gjithashtu rëndësia e standardizimit të raportimit të incidenteve dhe ndërtimit të një strukture të qëndrueshme për operimin dhe mirëmbajtjen e sistemit.