ASIG merr pjesë në konferencën ndërkombëtare “Thirrje vendit tënd! Hapësira, kujtesë gjuhësore, historike dhe antropologjike”

Autoriteti Shtetëror për Informacionin Gjeohapësinor (ASIG) mori pjesë më 17 janar 2025, në konferencën ndërkombëtare me titull “Thirrje vendit tënd! Hapësira, kujtesë gjuhësore, historike dhe antropologjike”, e organizuar nga Instituti i Antropologjisë, pjesë e Akademisë së Shkencave të Shqipërisë.

Kjo konferencë u drejtua nga dr. Ledi Shamku Shkreli dhe në fillim të saj mbajtën fjalën e tyre përshëndetëse akademiku z. Skënder Gjinushi, Kryetar i  Akademisë së Shkencave të Shqipërisë (ASHSH), prof. asoc. dr. Olsi Lelaj, Drejtor i Institutit të Antropologjisë (ASHSH), akademiku Valter Memishaj, drejtor i Institutit të Gjuhësisë dhe Letërsisë (IGJL-s), dr. Mirela Muço, drejtore e Agjencisë Kombëtare të Kërkimit Shkencor dhe Inovacionit (AKKSHI), dr. Vilma Tomço, drejtore e ASIG.

Znj. Tomço në fjalën e saj përshëndetëse theksoi rëndësinë që kanë të dhënat gjeohapësinore në ditët e sotme dhe sa të dobishme janë këto të dhëna për botën akademike.

Gjithashtu Denisa Kukaj, Përgjegjëse e Sektorit të Standardeve të Gjeoinformacionit bëri një prezantim të detajuar mbi punën e bërë nga ASIG në bashkëpunim me Instituti i Gjeografisë dhe Infrastrukturës Ushtarake (IGJIU) dhe IGJL në lidhje Emërtimet Gjeografike si dhe identifikimin e përsëritjeve të toponimeve duke reflektuar dhe duke ju dhënë mundësi studiuesve që ishin të pranishëm për të vazhduar kërkimet e mëtejshme në këtë fushë.